- 717 -

1447. Aug. 12.

Vnsern frundlichen grus zuuor. Erbern vnd weizen lieben frunde, die hochgebornen fursten vnd herren, herczog Heinrich vnd herczog Balthasar haben vns noch vnser begerunge eynen tag mit herczoge Wlodken gelegt, nemelich den nehisten sontag noch Assumpcionis Marie ken Grossen-Glogaw zukomen, vnd als wir euch alleczeit zu ewern eren vnd bestin willig gewest sein vnd noch sein wellen, bitten wir euch mit fleisse, ir wellet vns zu gute vff den genanten sontag noch vnser liben frawen tage Assumpcionis nehistkomen vff den obend zu Glogaw bey vns sein vnd nemelich eynen adir czwene aws ewerm rate dohin schicken wellit aldo zu den sachen zu horen vnd vns raten vnd beystendig zusein, vnd ken vns hyrynne thuen, als wir gerne allewege ken euch in sulchen sachen wedirumme tuen wellen, als wir das andern steten in vnserm bunde gehoren auch also geschriben vnd das von in begeret haben vnd bitten des ewir vorschreben antwort, das wellen wir gerne vordienen. Geben am sonnabunde vor Assumpcionis Marie, anno etc. XLVII°.
Ratmanne der stat Breslow.

Mit Rückaufschrift an den liegnitzer Rath.

Orig. Kgl. Bibl. z. Berl Ms. Boruss. f. 568. No. 27.

Urkunden-Buch der Stadt Liegnitz und ihres Weichbildes bis zum Jahre 1455 - Herausgegeben dr Friedrich Wilhelm Schirrmacher - Liegnitz 1866